البوست الثالث :- التربية حتى عمر 14 يوم - سلسلة مربى الدواجن الناجح للمبتدئين

• 
• السلام عليكم ورحمة الله
  **** البوست الثالث من سلسلة ازاى تكون مربى ناجح ****
  
  اتكلمنا فى البوستين الى فاتوا عن الاستقبال والتحضين وتوقفنا لغاية اليوم السابع من عمر القطيع .
  
  بوست النهارده مهم جدا , بداية اليوم بيكون الطائر تقريبا استهلك 300 جم علف دا فى حالة انه محقق وزن كويس وبيتغذى على علف بيلت
  وهنا بيكون بداية ظهور اول المشاكل وهي بداية نشاط السموم الفطريه معنى كدا ان هيحصل اجهاد على الكبد والكلى وايضا بداية حدوث اول الاتهابات المعويه الى بتؤدى بعد كدا الى الكوكسيديا والكلوسترديا , ودا بيكون على شكل اسهالات بنيه مصاحبه لخيوط حمرا بسيطه .
  
  طيب ازاى احافظ على الامعاء تكون نضيفه وازاى اتقى شر السموم الفطريه دى ؟
  
  عن تجارب حقليه لما استخدمنا الخل المركز (حمض الخليك ) فى اليوم التامن وبعد ظهور الاسهلات البنيه المصاحبه لخيوط حمراء تانى يوم نسبة الاسهالات دى تكاد تكون انتهت . ولما استمرينا بوضع حمض الخليك يوميا ماعدا ايام التحصين كانت النتائج مزهله ودا بسبب ان الخل المركز بيكون وسط حمضى ومعظم البكتريا الضاره لا تستطيع التعايش مع الوسط الحامضى ده لا وكمان بيساعد الفلورا فى الامعاء على نشاطها وبيعمل على زيادة مساحة خملات الامعاء مما يساعد على تحسين فرز انزيمات الهضم وامتصاص اكبر قدر من الغذاء وبالتالى معامل تحويل افضل وكانت جرعته فى العمر دا تقريبا 1/3 سم / لتر ماء .
  
  وفى مدارس بتضيف مضاد التهاب معوي عشان تتخلص من الاسهالات دى ولكن انا بحبز اكتر استخدام الخل المركز .
  
  عموما انا كنت بستخدمه دايما مع مضادات السموم ودا لانو بيزود فاعلية مضادات السموم وبيعمل نتايج كويسه جدا معاه , ولو حبيت تستخدمه لوحده مفيش مشكله وكدا يبقا انتا اتخلصت من الاتهابات المعويه .
  
  طيب بالنسبه للسموم ايه الحل ؟
  
  الحل انك تبداء فى اليوم التامن بوضع مضاد سموم وغسيل كلوى وبس .
  
  كدا انتا حافظت على الامعاء بتاعت الطائر وحافظت على الكبد والكلى لغاية عمر 12 يوم .
  
  اما عن الكوكسيديا , فغالبا فى كل المناطق الى بها رطوبه عاليه بتنشط الكلوسترديا عمر 13_14 يوم معنى كدا ايه ؟
  
  معنى كدا انى لازم اكون مستعد بجرعه وقت فترة حضانه المرض دا الى هوا عمر 11 يوم ومفيش مشكله لو بدأت من عمر 12 يوم بجرعه الكوكسيديا والكلوسترديا لمدة تلت تيام عمر (12_13_14) وهنا سؤال , ليه بحط مضاد كلوسترديا مش كوكسيديا بس !!!
  
  دا بسبب ان الكوكسيديا بيتبعها كلوسترديا والعكس صحيح ( اينما وجدت الكوكسيديا وجدت الكلوسترديا)
  
  طيب ايه افضل مضاد للكوكسيديا والكلوسترديا ؟
  
  بالنسبه للكوكسيديا اى منتج فيه المواد الفعاله دى ( ديك ترازوريل _ داى ترازوريل_ تولترازوريل ) .
  
  الكلوسترديا اى منتج برده يحتوى على امبرول هيكون فعال بازن الله ,
  
  *** ملحوظه يجب ان يكرر كورس مضاد السموم كل سبع تيام كحد اقصى ويفضل كل اربع تيام ويصحبه غسيل كلوى , ولا يستحب ان يكرر نفس برنامج الكوكسيديا والكلوسترديا بنفس الادويه يجب التغير ..